ଗୋଟିଏ କିମ୍ବା ଦୁଇଟି ନୁହେଁ ଏକା ସମୟରେ ୨୫ସ୍କୁଲରେ ପାଠ ପଢ଼ାଉଥିଲେ ଶିକ୍ଷୟିତ୍ରୀ। ଏଥିପାଇଁ ପ୍ରତି ମାସରେ ତାଙ୍କ ବ୍ୟାଙ୍କ ଖାତାକୁ ଆସୁଥିଲା ୧ କୋଟି ଟଙ୍କା। ଉତ୍ତରପ୍ରଦେଶରେ ଶିକ୍ଷା ବ୍ୟବସ୍ଥାରେ ଏଭଳି ଏକ କେଳେଙ୍କାରୀ ସାମ୍ନାକୁ ଆସିଛି।
ରାଜ୍ୟର ମୌଳିକ ଶିକ୍ଷା ବିଭାଗ ଅଧୀନରେ ଥିବା କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟ(କେଜିବିଭି)ରେ କାର୍ଯ୍ୟ କରନ୍ତି ଶିକ୍ଷୟିତ୍ରୀ ଅନାମିକା ଶୁକ୍ଳା। ବିଭାଗ ପାଖରେ ଥିବା ତଥ୍ୟ ଅନୁଯାୟୀ ଅନାମିକା ମେନ୍ପୁରି ଜିଲାର ବାସିନ୍ଦା। କେଜିବିଭିରେ ସେ ଫୁଲ୍ ଟାଇମ୍ ଶିକ୍ଷକ ଭାବେ କାମ କରୁଥିବା ବେଳେ ଅନ୍ୟ ସ୍କୁଲରେ ତାଙ୍କ ନାମ ରେଜିଷ୍ଟ୍ରେଶନ ରହିଛି। ଆମେଠି, ଆମ୍ବେଦକର ନଗର, ରାଏବରେଲି, ପ୍ରୟାଗରାଜ, ଅଲିଗଡ଼ ଆଦି ଜିଲାରେ ଥିବା ୨୫ ସ୍କୁଲରେ ସେ ଗୋଟିଏ ସମୟରେ ଶିକ୍ଷାଦାନ କରୁଥିବା ଜଣାପଡ଼ିଛି। ତେବେ ୧୩ ମାସ ଧରି ସେ ମାସକୁ ୧ କୋଟି ଟଙ୍କାରୁ ଅଧିକ ପାଉଣା ପାଇଛନ୍ତି। ସେ ଚଳିତବର୍ଷ ଫେବୃୟାରୀ ପର୍ଯ୍ୟନ୍ତ ଏଭଳି ଦରମା ପାଇଥିବା ଯାଞ୍ଚ ବେଳେ ଜଣାପଡ଼ିଛି। ଘଟଣା ସାମ୍ନାକୁ ଆସିବା ପରେ ତାଙ୍କ ଦରମାକୁ ରୋକି ଦିଆଯାଇଛି।
ଉତ୍ତରପ୍ରଦେଶର ମୌଳିକ ଶିକ୍ଷା ବିଭାଗ ମନ୍ତ୍ରୀ ସତିଶ ଦ୍ୱିବେଦୀ କହିଛନ୍ତି, ଘଟଣା ସମ୍ପର୍କରେ ସୂଚନା ମିଳିଛି। ଯଦି ଏହା ସତ୍ୟ ବୋଲି ଜଣାପଡ଼େ ତେବେ ଶିକ୍ଷୟିତ୍ରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ବିଭାଗକୁ ନିର୍ଦ୍ଦେଶ ଦିଆଯାଇଛି। ସରକାରଙ୍କ ପକ୍ଷରୁ ଏବେ ଡିଜିଟାଲ ଡାଟାବେସ୍ ପ୍ରସ୍ତୁତ କରାଯାଉଛି। ଫଳରେ ଏଭଳି ଘଟଣାକୁ ରୋକାଯାଇ ପାରିବ। ଦୋଷୀଙ୍କ ବିରୋଧରେ କଡ଼ା କାର୍ଯ୍ୟନୁଷ୍ଠାନ ନିଆଯିବ ବୋଲି ସେ କହିଛନ୍ତି।
