ଲଣ୍ଡନ, ୨୮।୫(ପି.ଟି.)- ଆଗାମୀ ଆନ୍ତର୍ଜାତିକ କ୍ରିକେଟ କାଉନସିଲ୍ (ଆଇସିସି) ବିଶ୍ୱକପ୍ ପାଇଁ ରେକର୍ଡ ସଂଖ୍ୟାରେ ଟିକେଟ୍ ବିକ୍ରି ହୋଇଛି। ଖାସ୍ କରି ମହିଳାମାନେ ଟିକେଟ କ୍ରୟ କରିବାରେ ବେଶ୍ ଆଗ୍ରହ ପ୍ରକଟ କରିଛନ୍ତି। ଏକ ଲକ୍ଷରୁ ଉର୍ଦ୍ଧ୍ୱ ସଂଖ୍ୟାର ମହିଳା ବିଶ୍ୱକପ୍ ଟିକେଟ କ୍ରୟ କରିଛନ୍ତି ବୋଲି ଆଇସିସି ତରଫରୁ କୁହାଯାଇଛି। ପ୍ରଥମଥର ପାଇଁ ଏହି ମେଗାଇଭେଣ୍ଟ ଅବସରରେ ପାଖାପାଖି ଦୁଇ ଲକ୍ଷ ଲୋକ ବିଶ୍ୱକପ୍ ମ୍ୟାଚ୍ ଦେଖିବାକୁ ଏଠାକୁ ଆସିବେ ବୋଲି ଟୁର୍ନାମେଣ୍ଟ ନିର୍ଦ୍ଦେଶକ ଷ୍ଟିଭ୍ ଏଲ୍ଓ୍ବର୍ଦି କହିଛନ୍ତି। ବିଶ୍ୱର ଏହି ସର୍ବଶ୍ରେଷ୍ଠ କ୍ରିକେଟ ଟୁର୍ନାମେଣ୍ଟକୁ ଆମେ ସୁଚାରୁରୂପ ପରିଚାଳନା କରିବାକୁ ପ୍ରୟାସ କରୁଛୁ। ଏକ ଲକ୍ଷ ଦଶ ହଜାର ମହିଳା ଟିକେଟ କିଣି ସାରିଲେଣି। ସେହପରି ୧ ଲକ୍ଷ ୧୬ ବର୍ଷରୁକମ୍ ଦର୍ଶକ ବିଶ୍ୱକପ୍ ମ୍ୟାଚ୍ ଦେଖିବାକୁ ଏଠାକୁ ଆସିବେ ବୋଲି ଏଲଓ୍ବର୍ଦି କହିଛନ୍ତି। ଏହି ର୍ଟୁନାମେଣ୍ଟ ଯୁବବର୍ଗକୁ କ୍ରିକେଟ ଖେଳିବାକୁ ପ୍ରେରିତ କରିବ। ପ୍ରଥମଥର ପାଇଁ ୨ଲକ୍ଷରୁ ଊର୍ଦ୍ଧ୍ୱ ଲୋକ କ୍ରିକେଟ ଉପଭୋଗ କରିବାକୁ ଏଠାକୁ ଆସୁଛନ୍ତି। ଦୀର୍ଘ ୨୦ ବର୍ଷପରେ ବ୍ରିଟେନରେ ବିଶ୍ୱକପ୍ ଆୟୋଜନ ହେବାକୁ ଯାଉଛି। ଟିକେଟ ପାଇଁ ପାଖାପାଖି ୪ ଲକ୍ଷ ଆବେଦନ ଆମେ ପାଇଛୁ ବୋଲି ସେ କହିଛନ୍ତି। ମେ ୩୦ରୁ ଆରମ୍ଭ ହେବାକୁ ଥିବା ଏହି ଇଭେଣ୍ଟରେ ଇଂଲଣ୍ଡ ଓ ଦକ୍ଷିଣ ଆଫ୍ରିକା ଉଦ୍ଘାଟନୀ ମୁକାବିଲାରେ ପରସ୍ପରକୁ ଭେଟିବେ। ଟୁର୍ନାମେଣ୍ଟରେ ମୋଟ ଉପରେ ୪୮ଟି ମ୍ୟାଚ୍ ଖେଳାଯିବ। ରାଉଣ୍ଡ ରବିନ୍ ଫର୍ମାଟ୍ରେ ୧୦ଟି ଦଳ ପ୍ରଥମେ ପରସ୍ପରକୁ ଭେଟିବେ। ଶ୍ରେଷ୍ଠ ୪ଟି ଦଳ ସେମିଫାଇନାଲରେ ପ୍ରବେଶ କରିବେ।
