ଓହିଓ,୫।୭: ପ୍ରେମ ହେଉଛି ଶାଶ୍ୱତ ଓ ଚିରନ୍ତନ। ପ୍ରେମ ନା ବୟସ ଦେଖେ ନା ଜାତିଧର୍ମ। ତା’ ପାଇଁ ସବୁ ସମାନ। କିଛି ଏଭଳି ଦୃଶ୍ୟ ସାମ୍ନାକୁ ଆସିଛି ଆମେରିକାରୁ। ଆମେରିକାର ଓହିଓରେ ଏକ ଯୋଡି ଶହେ ବର୍ଷ ବୟସରେ ବି ନିଜ ପ୍ରେମର ଲକ୍ଷ୍ୟସ୍ଥଳରେ ପହଞ୍ଚି ପାରିଛନ୍ତି। ଓହିଓରେ ରହୁଥିବା ୧୦୦ ବର୍ଷୀୟ ଜୋନ ଓ ୧୦୨ ବର୍ଷୀୟ ଫିଲିସ୍ ଏବେ ବିବାହ ବନ୍ଧନରେ ବାନ୍ଧି ହୋଇଛନ୍ତି। ଗତ ବର୍ଷ ଏକ କାର୍ଯ୍ୟକ୍ରମ ଜରିଆରେ ଦୁଇଜଣଙ୍କ ଭେଟ ହୋଇଥିବା ବେଳେ ଉଭୟ ପରସ୍ପରଙ୍କୁ ଡେଟ୍ କରୁଥିଲେ। ବନ୍ଧୁତାରୁ ଆରମ୍ଭ ହୋଇଥିବା ସମ୍ପର୍କ ପ୍ରେମରେ ପରିଣତ ହୋଇଥିଲା। ଏହାପରେ ଜନ୍ ଫିଲିସ୍ଙ୍କୁ ବିବାହ କରିଛନ୍ତି। ସୂଚନାମୁତାବକ, ଜନ୍ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଯୁଦ୍ଧ କରିଥିବା କୁହାଯାଉଛି। ପ୍ରାୟ ୧୦ ବର୍ଷ ପୂର୍ବରୁ ତାଙ୍କ ପ୍ରଥମ ପତ୍ନୀଙ୍କ ଦେହାନ୍ତ ହୋଇଥିଲା। ଅପରପକ୍ଷରେ ଫିଲିସ୍ଙ୍କ ସ୍ବାମୀଙ୍କ ମୃତ୍ୟୁ ୧୫ ବର୍ଷ ପୂର୍ବରୁ ହୋଇଥିଲା। ଏହାପରେ ସେ ବୃଦ୍ଧାଶ୍ରମରେ ରହୁଥିଲେ। ଭର୍ଜିନିଆରେ ରହୁଥିବା ଫିଲିସ୍ଙ୍କୁ ଚଳିତ ବର୍ଷ ଅଗଷ୍ଟ ୮ରେ ୧୦୩ ବର୍ଷ ଚାଲିବ। ତେବେ ଜନ୍ ଓ ଫିଲିସଙ୍କ ବିବାହ ଏବେ ସାରା ଦୁନିଆରେ ଚର୍ଚ୍ଚାର ବିଷୟ ପାଲଟିଛି।
