ଢେଙ୍କାନାଳ ଅଫିସ, ୧୪।୪
କେନ୍ଦ୍ରାପଡ଼ାରୁ ଛତିଶଗଡ଼ ଚାଲି ଚାଲି ଯାଉଥିବା ୧୩ଜଣ ଶ୍ରମିକଙ୍କୁ ଢେଙ୍କାନାଳ ସହର ଉପକଣ୍ଠ କଲେଜ ବାଇପାସ୍ରୁ ସୋମବାର ସନ୍ଧ୍ୟାରେ ଉଦ୍ଧାର କରାଯାଇଛି। ଛତିଶଗଡ଼ ନଉଗଁା ଅଞ୍ଚଳର ସମ୍ପୃକ୍ତ ଶ୍ରମିକମାନେ ଦୀର୍ଘଦିନ ହେଲା କେନ୍ଦ୍ରାପଡ଼ାରେ ରହି ଇଟାଭାଟିରେ କାମ କରି ଆସୁଥିଲେ। କରୋନା ସଂକ୍ରମଣ ରୋକିବା ଲାଗି ଲକ୍ଡାଉନ ଘୋଷଣା କରାଯିବା ପରେ ସେମାନେ ଫସି ରହିଥିଲେ। ହାତରେ କାମ ନ ଥିବାରୁ ପେଟକୁ ଦାନା ଯୋଗାଡ଼ କରିବା ବି କଷ୍ଟକର ହୋଇପଡ଼ିଥିଲା। ଏହାପରେ ସେମାନେ ଭିଟାମାଟିକୁ ଫେରିଯିବାକୁ ମନସ୍ଥ କରିଥିଲେ। ହେଲେ ଗାଡ଼ିମୋଟର ଯାତାୟାତ କରୁ ନ ଥିବାରୁ ପାଦରେ ଚାଲିଚାଲି ଯିବାକୁ ବାହାରିଥିଲେ। ସବୁଠାରୁ ଆଶ୍ଚର୍ଯ୍ୟର କଥା କଡ଼ାକଡ଼ି ଯାଞ୍ଚ ସତ୍ତ୍ୱେ ସମ୍ପୃକ୍ତ ଶ୍ରମିକମାନେ କେନ୍ଦ୍ରାପଡ଼ାରୁ ସାଲେପୁର, କଟକ ଦେଇ ୫୫ନଂ. ଜାତୀୟ ରାଜପଥରେ ଢେଙ୍କାନାଳ ପହଞ୍ଚତ୍ବା ଚର୍ଚ୍ଚାର ବିଷୟ ହୋଇଛି। ଉଦ୍ଧାର ଶ୍ରମିକଙ୍କୁ ସ୍ଥାନୀୟ ଜର୍ଜ ଉଚ୍ଚ ପ୍ରାଥମିକ ବିଦ୍ୟାଳୟରେ ରଖାଯାଇଛି। ସେମାନଙ୍କୁ ପୌରସଂସ୍ଥା ପକ୍ଷରୁ ଖାଦ୍ୟପାନୀୟ ଦିଆଯିବା ବ୍ୟବସ୍ଥା କରାଯାଇଥିବା ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ ଏବଂ ଟାଉନ ଥାନାଧିକାରୀ ଜ୍ଞାନରଞ୍ଜନ ସାମଲ ସୂଚନା ଦେଇଛନ୍ତି।
