ଖୋର୍ଦ୍ଧା ଅଫିସ,୨୦।୧୦: ଖୋର୍ଦ୍ଧା ଜିଲାର ବାଣପୁର ଥାନା ପୋଲିସ ୧୫ ଚୋରା ବାଇକ୍ ଜବତ କରିବା ସହ ୩ ଅଭିଯୁକ୍ତଙ୍କୁ ଗିରଫ କରି ରବିବାର କୋର୍ଟ ଚାଲାଣ କରିଛି। ସେମାନେ ହେଲେ ବାଣପୁର ଥାନା କୁଲେଇ ଗାଁର ସନ୍ତୋଷ କୁମାର ଜଗଦ୍ଦେବ ଓରଫ ମିଲୁ (୨୮), ଅଭି ଜୟସିଂହ ଓରଫ ମୁନା(୨୧) ଓ ସାଗର ହାତୀ(୧୯)। ଜାମିନ ନାମଞ୍ଜୁର ପରେ ଅଭିଯୁକ୍ତଙ୍କୁ ବାଣପୁର କୋର୍ଟ ଚାଲାଣ କରାଯାଇଥିବା ଖୋର୍ଦ୍ଧାରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ଅଜୟ ପ୍ରସାଦ ସ୍ବାଇଁ ସୂଚନା ଦେଇଛନ୍ତି।
ଏସ୍ପିଙ୍କ ସୂଚନା ଅନୁସାରେ ଗତ ୧୪ ତାରିଖରେ ଟାଙ୍ଗୀ ଥାନା ଚଣ୍ଡେଶ୍ୱର ଗାଁର ବସନ୍ତ ରଣାଙ୍କର (ଓଡି୦୨କେ ୪୦୭୪) ବାଇକ୍ ଚିଲିକା ବ୍ଲକ ଅଫିସ ଗଙ୍ଗାଧରପୁରଠାରୁ ଚୋରି ହୋଇଥିଲା। ଅଭିଯୋଗ ପରେ ପୋଲିସ କେସ୍ ନଂ. ୨୯୧/୧୯ରେ ମାମଲା ରୁଜୁ କରି ଘଟଣାର ତଦନ୍ତ କରୁଥିଲା। ଏଥିରେ ବାଇକ୍ ଲୁଟେରା ଦଳ ସାମିଲ ଥିବା ଜଣାପଡିଥିଲା ।
