ଢେଙ୍କାନାଳ ଅଫିସ, ୨୯।୫-ଲକ୍ଡାଉନ ନିୟମ ଭାଙ୍ଗି ଖୋଲାଖୋଲି ମଦ ବିକ୍ରି କରୁଥିବା ଅଭିଯୋଗରେ ଢେଙ୍କାନାଳ ସହରରେ୨ ବିଦେଶୀ ମଦ ଦୋକାନକୁ ପୋଲିସ ସିଲ୍ କରିଛି। ଜିଲାପାଳ ଭୂମେଶ ଚନ୍ଦ୍ର ବେହେରାଙ୍କ ନିର୍ଦ୍ଦେଶରେ ବସ୍ଷ୍ଟାଣ୍ଡ ଏବଂ ମହାବୀର ବଜାରସ୍ଥିତ ସମ୍ପୃକ୍ତ ଦୁଇ ବିଦେଶୀ ମଦ ଦୋକାନ ବିରୋଧରେ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଦୋଷୀ ସାବ୍ୟସ୍ତ ହେଲେ ଦୋକାନର ଲାଇସେନ୍ସ ରବ୍ଦ କରାଯିବ ବୋଲି ଜିଲାପାଳ କହିଛନ୍ତି। ଏହି ଦୁଇ ଦୋକାନର ବ୍ୟବସାୟୀଙ୍କ ନାମରେ ମାମଲା ରୁଜୁ ହୋଇଛି। ଘଟଣାର ତଦନ୍ତ ଚାଲିଛି। ଅଭିଯୁକ୍ତ ଫେରାର ଥିବା ଟାଉନ ଥାନାଧିକାରୀ ଜ୍ଞାନରଞ୍ଜନ ସାମଲ ସୂଚନା ଦେଇଛନ୍ତି।
ମେ ୨୫ରେ ଅନ୍ଲାଇନ୍ ମଦ ବ୍ୟବସାୟକୁ ଅନୁମତି ମିଳିଥିଲା। ହେଲେ ଉକ୍ତ ୨ ଦୋକାନରେ ସାମ୍ନାପଟୁ ତାଲା ପକାଯାଇ ଭିତିରିଆ ଅଫ୍ଲାଇନ୍ରେ ମଦ ବ୍ୟବସାୟ କରାଯାଉଥିବା ଅଭିଯୋଗ ହୋଇଥିଲା। ସବୁଠାରୁ ବଡ଼ କଥା ସିଲ୍ ହୋଇଥିବା ୨ ବିଦେଶୀ ମଦ ଦୋକାନଠାରୁ ୩୦୦ ମିଟର ଦୂରରେ ଜିଲା ଅବକାରୀ ଅଧିକ୍ଷକଙ୍କ କାର୍ଯ୍ୟାଳୟ ରହିଛି। ଏହାସତ୍ତ୍ୱେ ଏପରି ଅନିୟମିତତା କିପରି ଜଣାପଡ଼ିଲା ନାହିଁ, ତାକୁ ନେଇ ସହରରେ ଚର୍ଚ୍ଚା ଜୋର୍ ଧରିଛି। ଘଟଣା ଜଣାପଡିବା ପରେ ଜିଲାପାଳ ଅବକାରୀ ବିଭାଗକୁ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ। ହେଲେ ବିଭାଗୀୟ ଅଧିକାରୀଙ୍କ ନୀରବତା ପରେ ପୋଲିସ ପକ୍ଷରୁ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଜଣାପଡ଼ିଛି।
ଫଟୋ- ୧-ବସଷ୍ଟାଣ୍ଡସ୍ଥିତ ବିଦେଶୀ ମଦ ଦୋକାନକୁ ସିଲ କରାଯାଉଛି।)
