ନୂଆଦିଲ୍ଳୀ,୫।୬(ପି.ଟି.): ଭାରତ ୨୦୨୨ ମହିଳା ଏସିଆନ୍ କପ୍ ଆୟୋଜନ କରିବାକୁ ଅଧିକାର ପାଇଛି। ଏସିଆନ୍ ଫୁଟବଲ କନ୍ଫେଡେରେଶନ ୧୯୭୯ ପରେ ପ୍ରଥମଥର ପାଇଁ ଏହି ଟୁର୍ନାମେଣ୍ଟ ଆୟୋଜନ ପାଇଁ ଭାରତକୁ ଅଧିକାର ଦେଇଛି। ଏଏଫ୍ସି ମହିଳା ଫୁଟବଲ କମିଟି ବୈଠକରେ ଏ ସଂକ୍ରାନ୍ତରେ ନିଷ୍ପତ୍ତି ନିଆଯାଇଛି। ଗତ ଫେବୃୟାରୀରେ ଏଏଫ୍ସି ଫୁଟବଲ କମିଟି ଏହି ଟୁର୍ନାମେଣ୍ଟ ଆୟୋଜନ କରିବା ପାଇଁ ଭାରତକୁ ପ୍ରସ୍ତାବ ଦେଇଥିଲା।
ଏ ନେଇ ଏଏଫସି ତରଫରୁ ଅଲ ଇଣ୍ଡିଆ ଫୁଟବଲ ଫେଡେରେଶନ (ଏଆଇଏଫ୍ଏଫ୍)କୁ ଚିଠି ଲେଖି ଅବଗତ କରାଯାଇଛି। କମିଟି ଏଆଇଏଫ୍ଏଫ୍କୁ ଏହି ଟୁର୍ନାମେଣ୍ଟ ଆୟୋଜନ ଅଧିକାର ପ୍ରଦାନ କରିବା ନେଇ ନିଷ୍ପତ୍ତି ନେଇଛି ବୋଲି ଏଏଫ୍ସି ସାଧାରଣ ସମ୍ପାଦକ ଡାଟୋ ଓ୍ବିଣ୍ଡସୋର ଜନ୍ ଏହି ଚିଠିରେ ଉଲ୍ଲେଖ କରିଛନ୍ତି। ବର୍ଷର ଦ୍ୱିତୀୟାର୍ଦ୍ଧରେ ଏହି ଟୁର୍ନାମେଣ୍ଟ ଆୟୋଜନ ହେବ। ୧୯୭୯ରେ ଭାରତ ରନର୍ସ ଅପ୍ ବିବେଚିତ ହୋଇଥିଲା। ଆୟୋଜନ ଅଧିକାର ପ୍ରଦାନ କରିଥିବାରୁ ଏଏଫ୍ସିକୁ ଏଆଇଏଫ୍ଏଫ୍ ଅଧ୍ୟକ୍ଷ ପ୍ରଫୁଲ ପଟେଲ ଧନ୍ୟବାଦ ଜଣାଇଛନ୍ତି।
ଭାରତରେ ଏହି ଟୁର୍ନାମେଣ୍ଟ ଆୟୋଜନ ହେବା ଦ୍ୱାରା ମହିଳା ଫୁଟବଲ୍ରେ ବିପ୍ଳବ ଆସିବ ଓ ଫୁଟବଲରମାନେ ଉତ୍ସାହିତ ହେବେ ବୋଲି ପଟେଲ ଆଶା ପ୍ରକାଶ କରିଛନ୍ତି। ଟୁର୍ନାମେଣ୍ଟରେ ୧୨ଟି ଦଳ ଅଂଶଗ୍ରହଣ କରିବେ। ଗତ ସଂସ୍କରଣରେ ୮ଟି ଦଳ ଭାଗନେବାର ସୁଯୋଗ ପାଇଥିଲେ। ତେବେ ଏଥର ଅଧିକ ୪ଟି ଦଳ ଅଂଶଗ୍ରହଣ କରିବେ। ଆୟୋଜକ ହିସାବରେ ଭାରତ ଏହି ଟୁର୍ନାମେଣ୍ଟ ଖେଳିବାକୁ ସିଧାସଳଖ ଯୋଗ୍ୟତା ହାସଲ କରିଛି। ଏହି ଏସିଆନ କପ୍ ମଧ୍ୟ ୨୦୨୩ ଫିଫା ମହିଳା ବିଶ୍ୱକପ୍ ପାଇଁ ଅନ୍ତିମ ଯୋଗ୍ୟତା ପର୍ଯ୍ୟାୟ ଟୁର୍ନାମେଣ୍ଟର ମାନ୍ୟତା ପାଇଛି। ଆସନ୍ତାବର୍ଷ ଭାରତରେ ଫିଫା ୧୭ ବର୍ଷରୁ କମ ମହିଳା ବିଶ୍ୱକପ୍ ମଧ୍ୟ ଆୟୋଜନ ହେବାର କାର୍ଯ୍ୟକ୍ରମ ରହିଛି। ଫଳରେ ଏଆଇଏଫ୍ଏଫ୍ ଆହୁରି ଉତ୍ସାହିତ ହେବ ବୋଲି ଆଶା କରାଯାଉଛି। ଭାରତ ପୂର୍ବରୁ ୨୦୧୬ରେ ଏଏଫ୍ସି ୧୬ ବର୍ଷରୁ କମ୍ ଚାମ୍ପିୟନଶିପ୍ ଓ ୨୦୧୭ରେ ୧୭ ବର୍ଷରୁ କମ୍ ଫିଫା ବିଶ୍ୱକପ୍ ସଫଳତାର ସହ ଆୟୋଜନ କରିଥିଲା। ମହିଳା ଏସିଆନ୍ କପ୍ ଆୟୋଜନ ହେଲେ ଭାରତରେ ମହିଳା ଫୁଟବଲ ଆହୁରି ଲୋକପ୍ରିୟ ହେବ ବୋଲି ଏଆଇଏଫ୍ଏଫ୍ ସାଧାରଣ ସମ୍ପାଦକ କୁଶଲ ଦାସ କହିଛନ୍ତି।
