ଭୁବନେଶ୍ୱର,୧୮।୬(ବ୍ୟୁରୋ): କରୋନା ଯୋଗୁ ପୁରୀରେ ରଥଯାତ୍ରା ହେବ ନା ନାହିଁ ସେନେଇ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇପାରି ନାହିଁ। ଅପରପକ୍ଷରେ ରାଜ୍ୟର ୩୦ଟି ସ୍ଥାନରେ ଥିବା ପ୍ରମୁଖ ମନ୍ଦିର ପରିସରରେ ରଥପର୍ବ ଆୟୋଜନ କରିବାକୁ ବିଭିନ୍ନ ମନ୍ଦିର କମିଟି ପକ୍ଷରୁ ନିଷ୍ପତ୍ତି ନିଆଯାଇଛି। ସମ୍ପ୍ରତି କରୋନା ସଂକ୍ରମଣକୁ ଦୃଷ୍ଟିରେ ରଖି ରଥଟଣା ସମ୍ଭବ ନୁହେଁ। ତେଣୁ ମନ୍ଦିର ପରିସରରେ ବିଧି ରକ୍ଷା ନିମନ୍ତେ କେବଳ ସେବାୟତଙ୍କ ଦ୍ୱାରା ଏହି ପର୍ବ ସମାପନ କରିବାକୁ ନିଷ୍ପତ୍ତି ନିଆଯାଇଛି। ଭକ୍ତବିହୀନ ରଥଯାତ୍ରା ଶ୍ରଦ୍ଧାଳୁଙ୍କ ଭାବାବେଗକୁ ପ୍ରଭାବିତ କରୁଥିଲେ ସୁଦ୍ଧା ଜନସମାଗମକୁ ଅନୁମତି ଦିଆଯିବା ଉଚିତ ହେବ ନାହିଁ। ତେଣୁ ଏଥର ବାରିପଦାର ହରିବଳଦେବଙ୍କ ରଥ, ବାହୁଡ଼ା ଯାତ୍ରା ସବୁଥର ଭଳି କରାଯିବା ସମ୍ଭବପର ନୁହେଁ ବୋଲି ମନ୍ଦିର ପରିଚାଳନା କମିଟି ପକ୍ଷରୁ କୁହାଯାଇଛି। ଏହା କେବଳ ସେବାୟତମାନଙ୍କ ସହଯୋଗରେ ମନ୍ଦିର ଭିତରେ ପାଳିତ ହେବ ବୋଲି କୁହାଯାଇଛି। ସେହିପରି ବାଲେଶ୍ୱର ଜିଲା ଖଗଡ଼ପଲର ଜଗନ୍ନାଥ ମନ୍ଦିର, ବାଲିଆପାଳ ଜଗନ୍ନାଥ ମହାପ୍ରଭୁ ମନ୍ଦିର, ଜନୁଗଞ୍ଜ ଜଗନ୍ନାଥ ରଥଯାତ୍ରା କମିଟି, ସୋର ଜଗନ୍ନାଥ ମନ୍ଦିର, ଜଳେଶ୍ୱର ଇସ୍କନ ମନ୍ଦିର, ରାୟପୁର ଜଗନ୍ନାଥ ମନ୍ଦିର, ମୁବାରକପୁର ଜଗନ୍ନାଥ ମନ୍ଦିର, ରେମୁଣା ଜଗନ୍ନାଥ ମନ୍ଦିରରେ ପୂର୍ବ ବର୍ଷଗୁଡିକ ଭଳି ରଥଯାତ୍ରା ହେବନାହିଁ। ଏଥର ସେବାୟତମାନଙ୍କ ସହଯୋଗରେ ମନ୍ଦିର ପରିସରରେ ସବୁକିଛି କରାଯିବ। ସେହିପରି କନ୍ଧମାଳ ଜିଲାର ଫୁଲବାଣୀ, ବାଲିଗୁଡା, ବଲାଙ୍ଗୀର ଜିଲାର ସବ୍ଡିଭିଜନ ଏବଂ ଟିଟିଲାଗଡ ସବ୍ଡିଭିଜନ, ସମ୍ବଲପୁରର ଦେବୋତ୍ତର କମିଟି ଏବଂ ଜଗନ୍ନାଥ କଲୋନୀ ପୂଜା କମିଟି, ଧନୁପାଲି ରଥଯାତ୍ରା କମିଟି, ସମ୍ବଲପୁର ସହରର କ୍ଷେତ୍ରଜପୁର ରଥଯାତ୍ରା କମିଟି, ମୟୂରଭଞ୍ଜ ଜିଲାର ୬ଟି ସ୍ଥାନ ଏବଂ ଗଜପତି ଜିଲାର ପାରଳାଖେମୁଣ୍ଡି ରଥଯାତ୍ରା କମିଟି ଓ ଆର୍ ଉଦୟଗିରି ଜଗନ୍ନାଥ ମନ୍ଦିର କମିଟି ପକ୍ଷରୁ ଚଳିତ ବର୍ଷ କେବଳ ମନ୍ଦିର ପରିସର ମଧ୍ୟରେ ରଥଟଣା ବିଧି ସମାପନ କରାଯିବ ବୋଲି ସୂଚନା ଦିଆଯାଇଛି।
