ଶ୍ରୀନଗର,୨୬ା୮(ଆଇଏଏନ୍ଏସ୍): ଜମ୍ମୁ-କଶ୍ମୀରର ସ୍ବତନ୍ତ୍ର ପାହ୍ୟା ପ୍ରତ୍ୟାହାର ନେଇ କେନ୍ଦ୍ରର ନିଷ୍ପତ୍ତି ସମସ୍ତ ଅନ୍ତର୍ଜାତୀୟ ଆଇନ ଓ ଜାତିସଂଘର ସଂକଳ୍ପନାମାକୁ ଉଲ୍ଲଂଘନ କରୁଛି। ଏହାଦ୍ୱାରା କଶ୍ମୀରରେ ଜନସଂଖା ପରିସଂଖ୍ୟାନରେ ପରିବର୍ତ୍ତନ ଆଣି ଉପନିବେଶ ସ୍ଥାପନ କରିବାକୁ ଚାହୁଁଛି କେନ୍ଦ୍ର। ତେଣୁ ଏଭଳି ଘଡ଼ିସନ୍ଧି ମୁହୂର୍ତ୍ତରେ ୩୭୦ ଉଚ୍ଛେଦ ନିଷ୍ପତ୍ତିକୁ ବିରୋଧ କରିବା ପାଇଁ ଉପତ୍ୟକାବାସଙ୍କୁ ଆହ୍ବାନ ଦେଇଛନ୍ତି ଅଲ୍ ପାର୍ଟି ହୁରିୟାତ୍ କନ୍ଫରେନ୍ସ ଅଧ୍ୟକ୍ଷ ସୟଦ ଅଲି ଶାହ ଗିଲାନି। ପାକିସ୍ତାନ ସହ କଶ୍ମୀରର ମିଶ୍ରଣ ପାଇଁ ଓକିଲାତି କରୁଥିବା ୮୯ ବର୍ଷୀୟ କଠୋରପନ୍ଥୀ ବିଚ୍ଛନ୍ନତାବାଦୀ ନେତା ଗିଲାନି କହିଛନ୍ତି, କେନ୍ଦ୍ରର ନିଷ୍ପତ୍ତି ବିରୋଧରେ ପ୍ରତିବାଦ ଜଣାଇବା ପାଇଁ ଜନସାଧାରଣ ନିଜ ନିଜ ଅଞ୍ଚଳରେ ଶାନ୍ତିପୂର୍ଣ୍ଣ ଭାବେ ବିକ୍ଷୋଭ କରନ୍ତୁ। ସଶସ୍ତ୍ର ଶତ୍ରୁ (ସୁରକ୍ଷା ବଳ) ଲୋକଙ୍କୁ ହତ୍ୟା କରିବା ପାଇଁ ପ୍ରସ୍ତୁତ ରହିଛି। ତେଣୁ ଶତ୍ରୁକୁ ଏହାର ସୁଯୋଗ ନ ଦେବା ପାଇଁ ଶୃଙ୍ଖଳିତ ଭାବେ ଆନ୍ଦୋଳନ କରନ୍ତୁ ବୋଲି ଗିଲାନି ପରାମର୍ଶ ଦେଇଛନ୍ତି। ସୁରକ୍ଷା ବଳର ଆକ୍ରମଣରେ ସେମାନଙ୍କର କିଛି ଘଟିଲେ ସେଥିପାଇଁ ଭାରତୀୟ ସେନା ଦାୟୀ ଏବଂ ବିଶ୍ୱ ସମୁଦାୟ ସାକ୍ଷ୍ୟ ରହିବ ବୋଲି ଗିଲାନି କହିଛନ୍ତି।
