ଲଣ୍ଡନ,୧୯।୪: ବ୍ରିଟେନ ମହାରାଣୀ ଏଲିଜାବେଥଙ୍କ ଜନ୍ମଦିନ ଚଳିତ ବର୍ଷ ପାଳନ କରାଯିବନାହିଁ। ୬୮ ବର୍ଷରେ ପ୍ରଥମଥର ମହାରାଣୀଙ୍କ ଜନ୍ମଦିନ ପାଳନକୁ ବନ୍ଦ କରିଦିଆଯାଇଛି। ଦେଶରେ କରୋନା ସଂକ୍ରମଣକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଛି। ଏହାସହ ଜନ୍ମଦିନରେ ତାଙ୍କୁ ଦିଆଯାଉଥିବା ପାରମ୍ପରିକ ତୋପ ସଲାମି ମଧ୍ୟ ଏଥର ଦିଆଯିବ ନାହିଁ ବୋଲି ସୂଚନା ମିଳିଛି। ବକିଂହାମ ପ୍ୟାଲେସ ପକ୍ଷରୁ ଶନିବାର ଏହି ସୂଚନା ଦିଆଯାଇଛି। ଉକ୍ତ ସୂଚନା ଅନୁଯାୟୀ, ମହାରାଣୀ ଏଲିଜାବେଥ ଦ୍ୱିତୀୟ ୨୧ ଏପ୍ରିଲରେ ପାଳନ କରିବାକୁ ଥିବା ତାଙ୍କ ୯୪ତମ ଜନ୍ମଦିନର ପାରମ୍ପରିକ ଉତ୍ସବକୁ ରଦ୍ଦ କରିଦେଇଛନ୍ତି। ତେବେ ୯୩ ବର୍ଷିୟା ମହାରାଣୀଙ୍କ ଶାସନକାଳରେ ପ୍ରଥମଥର ଲାଗି ତାଙ୍କ ଜନ୍ମଦିନର ସମସ୍ତ ସମାରୋହକୁ ବନ୍ଦକରି ଦିଆଯାଇଥିବା ସେଥିରେ ଉଲ୍ଲେଖ କରାଯାଇଥିଲା। ତେବେ ମହାରାଣୀଙ୍କୁ ଫୋନ ଅବା ଭିଡିଓ କଲ ମାଧ୍ୟମରେ ଜନ୍ମଦିନ ଶୁଭେଚ୍ଛା ଜଣାଇ ପାରିବେ ବୋଲି ବକିଂହାମ ପ୍ୟାଲେସ ପକ୍ଷରୁ କୁହାଯାଇଛି। କରୋନା ଭାଇରସ କାରଣରୁ ସୋସିଆଲ ଡିଷ୍ଟାନସିଂକୁ ଗୁରୁତ୍ୱ ଦେଇ ଏଭଳି ନିଷ୍ପତ୍ତି ନିଆଯାଇଛି। ସୂଚନାଯୋଗ୍ୟ, ବ୍ରିଟେନରେ ଏବେ କରୋନା ସଂକ୍ରମିତଙ୍କ ସଂଖ୍ୟା ୧,୧୪,୨୧୭ରେ ପହଞ୍ଚିଥିବା ବେଳେ ୧୫,୪୬୪ ଜଣଙ୍କ ମୃତ୍ୟୁ ମଧ୍ୟ ହୋଇ ସାରିଲାଣି। ତେଣୁ ଦେଶରେ କରୋନା ସ୍ଥିତି ଗମ୍ଭିର ରହିଛି କହିଲେ ଚଳେ।
