ନୂଆଦିଲ୍ଲୀ,୧୦।୬: ପ୍ରମୁଖ ବିସ୍କୁଟ କମ୍ପାନୀ ପାର୍ଲେଜି ବିକ୍ରି କ୍ଷେତ୍ରରେ ୮୨ ବର୍ଷର ରେକର୍ଡକୁ ଭାଙ୍ଗି ଦେଇଛି। ଗତ ବର୍ଷ କମ୍ପାନୀ ଚାପରେ ରହିଥିବା କହିଥିଲା। ଫଳରେ ୧୦ ହଜାର ଲୋକଙ୍କୁ ଛଟେଇ କରିବ ବୋଲି ଯୋଜନା ମଧ୍ୟ ରଖିଥିଲା। ହେଲେ କରୋନା ଭାଇରସ୍ ଲକ୍ଡାଉନ କମ୍ପାନୀ ଲାଗି ବିକ୍ରିର ଏକ ଭଲ ସୁଯୋଗ ଆଣିଛି। ଫଳରେ କମ୍ପାନୀ ବିକ୍ରି ରେକର୍ଡ କରିବାକୁ ସକ୍ଷମ ହୋଇଥିବା ଜଣାପଡିଛି। ଲକ୍ଡାଉନରେ ପ୍ରତି ବର୍ଗର ଲୋକ କମ୍ପାନୀର ପ୍ରଡକ୍ଟକୁ ପସନ୍ଦ କରିଥିବା ଏହା ସୂଚନା ଦେଇଛି। ଖାଦ୍ୟ ସହ ଏହାକୁ ବଣ୍ଟନ ଲାଗି ବ୍ୟବହାର କରାଯାଇଥିଲା। ଶହ ଶହ କି.ମି. ପାଦରେ ଚାଲି ଘରକୁ ଫେରୁଥିବା ପ୍ରବାସୀ ଶ୍ରମିକଙ୍କ ଲାଗି କମ୍ପାନୀର ୫ ଟଙ୍କିଆ ପ୍ୟାକେଟ ବିସ୍କୁଟ ଲାଭକାରୀ ସାବ୍ୟସ୍ତ ହୋଇଛି। କେତେଜଣ ଲୋକ ଏହାକୁ କିଣି ଖାଉଥିବା ବେଳେ ବଣ୍ଟାଯାଉଥିବା ବିସ୍କୁଟ ଲୋକମାନେ ଗ୍ରହଣ କରିଛନ୍ତି। ଲକ୍ଡାଉନରେ ଲୋକମାନେ ପାର୍ଲେଜି ବିସ୍କୁଟର ଷ୍ଟକ୍ ମଧ୍ୟ ନିଜ ଘରେ ରଖିଥିବା ଜଣାପଡିଛି। ପାର୍ଲେ ପ୍ରଡକ୍ଟର କଣ୍ଟ୍ରି ହେଡ୍ ମୟଙ୍କ ଶାହ କହିଛନ୍ତି, ବିକ୍ରି ଭଲ ହେବା ଯୋଗୁ କମ୍ପାନୀର ଶେୟାର ମୂଲ୍ୟରେ ପ୍ରାୟ ୫% ବୃଦ୍ଧି ଘଟିଥିବା ଜଣାପଡିଛି।
